由細到大我都好想養貓貓, 但媽咪又唔准, 所以結婚後第一件事就去SPCA領養返隻貓. 記得果日去到SPCA, 本來同一隻叫Roman的黑白貓仔玩得非常投契, 但始終覺得仲差d, 後來再望下, 見到一隻細細隻叫Jenny的虎紋貓係佢自己個貓箱度按下按下咁按張被, 見佢咁得意, 又肯比人抱(雖然佢個身都震晒), 即刻決定要帶佢返屋企 (後尾諗返都覺得奇怪, 就連SPCA個職員都唔明點解我會捨Roman要Jenny)
第一次養貓, 其實都有少少驚, 成日形住d貓好鍾意抓人咬人, 好在雞旦仔剛剛入門時都算文靜. 後來熟習左環境就原形畢露, 變成而家o既長氣八卦妹.
剛入門的雞旦仔係度扮淑女
雞旦仔鍾意行行下碌地沙. 而家為左呃梳毛叫佢"碌係度"佢都會照碌
叫得八卦妹, 就真係好八卦下. 尤其是d櫃桶呀箱呀盒呀,
一打開左隻臭豬就要去八. 仲鍾意偷走出大門,
可能佢奇怪點解爹o也媽咪成日由大門出去, 究竟有咩玩呢?
有一日無閂好個櫃桶, 老公返到屋企就見到遍地屍駭.
案件現時仍在調查中, 如各位市民認出相中疑兇條尾,
請立即與本人聯絡!
除左八卦, 雞旦仔仲有另一個嗜好: 梳毛
隻衰豬唔知幾時開始學識做戲,
成日都扮痕週圍R係度呃梳毛!
飲食方面, 雞旦仔算相當易養,
鍾意食乾糧多過罐頭. 小食方面淨係鍾意食魚仔乾.
為左食魚仔, 雞旦仔可以表演佢o既獨門絕技:
雞旦仔, 企起身, 食魚仔!
一講貓經就真係十日十夜都講唔完,今次講住咁多先, 下次再分享三貓趣事!
如果大家想探下雞旦仔, 可以到旦豬爹o也為佢而設的個人寫真集
http://www.fotop.net/lncb/Eggy
沒有留言:
張貼留言