家有三隻旦．酥．糕 之 兩酥相遇

如是者, 四貓就在打打鬧鬧中過了一天...

---

第二日...

就係咁, 旦酥糕媽就做咗第一次貓褓母. 同日我一歲多嘅契女亦都上咗嚟探我哋, 而我就真正明白到咩叫"弱肉強食":

貓奴被旦酥糕蝦 → 旦酥糕被HUGO蝦 → HUGO被小朋友嚇

結論係: 小朋友果然最巴閉!

其實HUGO同牛酥的確好有淵緣, 話說牛酥平日最鍾意係窗口八卦, 而隔離屋個小朋友係對面窗望到牛酥咁得意, 就問爸爸媽媽可唔可以養一隻貓貓. 爸爸媽媽起初都有啲猶豫, 但最後都俾小朋友去SPCA收養一隻貓仔, 就係HUGO啦! 佢真係好似牛酥㗎! 不過HUGO就瘦好多, 眼晴又係紅色嘅.

HUGO係一隻八卦豬, 好鍾意搗亂但又好嗲好鍾意人抱. 可能因為佢屋企得佢一隻貓, 所以佢鍾意人多過貓. 呢隻小霸王嚟到我屋企唔拍生不特止, 仲居然夠膽出手"hell"旦酥糕個貓頭; 旦酥糕當然不甘示弱, 三隻輪流扮蛇仔"fee"返夠本. 而其實HUGO亦真係好掛住屋企, 成日企係門口度喵喵大叫....總之旦酥糕爸媽就係吵鬧聲中過咗一個非常熱鬧嘅週未!