10日34小時

有驚無險, 遲咗34個鐘, 終於返到屋企.

事緣我地前一晚坐火車由阿斯旺返到開羅, 打算第二日落車就坐飛機返香港, 點知班火車居然delay咗4個鐘, 搞到趕唔切班機, 沒辦法, 唯有留多一日撘第二日嘅航班.

要搞掂一行16人, 機位方面相當緊張, 但經過多方努力, 我地最終都順利由開羅飛到新加坡, 以為會一切順利, 但都唔知個日係乜日子, 由新加坡飛去香港嘅機位全日都好爆, 我都就係咁係新加坡機場呆等10個鐘.

慶幸今次跟團跟著大公司, 見領隊不眠不休, 電話響個不停 , 最後連新加坡航空公司的經理出面幫我地擠機位(真係逐個逐個擠出黎), 我地最終都走得甩!

患難見真情, 今次嘅經歷令我地認識到一班好團友. 希望將來都可以keep in touch.

呆等10小時的基地

P.S. 返到屋企, 三位主子其中兩隻, 一如以往, 忘記咗貓奴亦誤認為貓奴乃陌生人等, 匿入梳化底避難. 而旦豬妹妹係認得出我地, 更記得我地應承過要依時歸來, 家陣言而無信,  被旦豬主子喵喵喵喵嘈了成晚, 後來牛酥和砵砵終於出返嚟, 三貓來個大合唱務要批鬥貓奴至無地自容.

正所謂"罐罐打貓牙骹軟", 為了補鑊, 貓奴二話不說即刻去開罐罐.