我係孻仔 - 砵仔糕

今次要介紹o既係我家老么: 砵仔糕.

從小到大, 砵砵都係令媽咪爹o也最費心的一隻豬. 最乖又係佢, 最曳又係佢, 叫我地又愛又恨. 此話何解? 且看下文分解:

話說某日媽咪鋪養貓癮又發作, 於是就走去SPCA度睇貓貓. 去到就問職員邊隻貓貓最黐人, 職員就指指一隻叫Campo的黑貓仔. 貓仔得3個月大, 睇真d, 有白頸巾架啵! 旦豬牛酥又係有白頸巾架喎! 於是心中一動, 雖然職員話Campo之前試過比人退過返SPCA, 但我無問清楚原因就帶左Campo返屋企.

 

砵仔糕初入門o既時候, 成日無黎精神, 

隔左幾日, 問題就開始出現.

先係耳仔有大量o既耳垢, 加上隻衰豬可能覺得對耳仔唔舒服, 係咁用隻後腳R到出血.
再黎就唔知幾時自己咬到自己個咀仔, 之後腫左同發炎.
最後係鼻頭頸背尾巴生癬...

為左睇病, 砵仔進進出出診所不知幾多次. 媽咪每日兩次洗耳仔洗傷口洗頭罩餵食藥滴耳藥搽藥膏; 每星期2次用藥水沖涼洗走d癬菌. 仲要每日抺地保持屋企清潔免得感染埋家姐阿哥... 卒之前前後後要兩個幾三個月先醫返好.

可憐砵仔糕, BB時候趣緻可愛, 

但耳仔兩邊就因為要滴耳藥而長期濕答答.

亦因為要隔離, 砵砵o既童年都要係籠裡面度過.

砵砵終於長大啦. 已經由一隻潺弱小貓, 變成一隻身型纖長o既健康活潑貓. 可惜另一個問題又出現: 砵砵會隨處便溺! 唔知係咪因為太細個就離開貓媽咪, 又無有長輩教導, 定還是細個病得太緊要而變蠢, 砵砵係唔識分辦邊度係廁所邊度唔係. 只要係軟綿綿o既地方都有可能變做佢o既貓砂盤. 最高記錄試過一個月洗三次羽絨被. 還有地氈梳化衣服頸巾亦相繼蹧殃. 怎樣打怎樣鬧都教唔識, 有時真係嬲到想掉佢出街. 但只要睇到砵砵個無辜眼神, 又實在點忍心遺棄佢? 不過唔忍心還唔忍心, 媽咪爹o也夜晚要襟羽絨被o既時候, 就要請砵入籠啦!

雖然砵砵有隨處便溺o既懷習慣, 但佢亦有佢可愛一面. 咪睇砵砵一個惡樣, 但其實係o爹精一名. 每次一叫"砵砵!" 佢就會老遠走過黎o爹你隻腳.

砵砵: "嗯? 咩黎架?"

正所謂四肢發達, 頭腦簡單. 單純o既砵砵係運動方面有相當出色o既表現. 簡單如玩毛毛棒直情係一擊必中. 就連家姐o既獨門絕技"執波仔"都識, 速度更快到與拋出o既物件同步到達.

老人家話如果想知隻貓識唔識捉老鼠, 只要從頸後抓起佢, 後腳縮埋就係隻勤力貓. 而砵砵被抓起o既時候對後腳簡直係貼住肚皮: 可見砵仔糕必定係老鼠剋星!

講住咁多先, 如果大家想探下砵仔糕, 可以到砵砵爹o也為佢而設o既個人寫真集:
http://www.fotop.net/lncb/Muggy