我係老二 - 牛利酥

  童年: 眉清目秀, 相當精靈可愛    現在: 活脫脫麻甩貓一隻
無錯, 今次要介紹o既係我家老二: 牛利酥.

雖然話旦`酥`糕三隻豬都係媽咪o既心肝寶貝, 但不得不承認, 我確係偏心酥仔多d.

我對牛利酥可謂一見鍾情. 話說4年前先開始養人生中第一隻貓, 而養開貓o既人都知道, 養貓確係有鋪癮. 養得第一隻, 就心思思想養多隻. 當初雞旦仔入門時已經係一隻一歲o既成貓, 所以心諗, 不如領養多隻貓仔陪下旦豬啦 (旦豬怪叫: 我都無話過要貓陪! 根本係你自己想養!). 跟住就上SPCA個網站, 見到一隻橙色貓(如下)

 

心諗, 呢隻貓仔好得意喎, 招招積積咁, 應該幾醒目. 之後就二話不說拿拿聲飛去SPCA睇真貓. 原來隻貓仔叫Pizza, 得5個月大, 岩岩係寄養家庭返到SPCA. 同佢玩左陣, 發覺佢好鍾意人地摸佢手仔同餵佢食野, 但係就唔．抱．得．.一抱就大叫兼伸爪. 職員都話PIZZA係隻惡貓仔, 之前要住大房做socialization(貓都要搞社交?)....其實都無聽到入耳 , 因為我已經被PIZZA迷住, 再惡都要帶佢返屋企.

岩岩返到屋企, 其實應該係要困籠隔離幾日, 但為怕佢太悶, 我就放佢出o黎一陣等佢認識下新環境, 點知隻衰仔出過o黎就唔甘心再被困, 係籠裡面大吵大鬧, 無辦法之下都要放貓, 可憐雞旦仔就咁被惹到鼻頭生癬. (旦豬, 媽咪對你唔住...)

惡貓仔果然名不虛傳, 實在惡死得緊要, 剪趾甲簡直好似要左佢條命咁. 當初同牛酥剪趾甲一定要合二人之力, 先用毛巾將惡貓捲成一件貓卷: 一人死命捉實貓卷, 另一人冒死逐隻腳仔剪趾甲...但後來發現到牛酥o既死穴: 貪吃, 跟住往後o既日子只要每剪一隻趾甲就比一舊小食, 惡貓都會變綿羊, 乖乖咁任你魚肉.

惡貓貓卷

牛酥:"我? 綿羊?"
惡歸惡, 牛利酥始終係一名超級細膽仔, 無論有人大叫, 有陌生人到訪, 門口有怪聲, 放煙花, 行雷等等...等等... 總之一有咩唔對路, 牛酥必然會以光速匿入梳化底 (極度驚慌時會匿入雪櫃頂的微波爐後面), 成日比我地笑最大隻又係佢, 最無膽又係佢!

牛酥: "好驚喎!"

梳化底依舊, 可惜身型大左, 牛酥每次出返黎都要扮陸戰隊隊員...
講住咁多先, 如果大家想探下牛利酥, 可以到牛酥爹o也為佢而設的個人寫真集:
http://www.fotop.net/lncb/Cowie