聖誕節旦酥糕爸媽跑到珠海鬆一鬆，目的地:
珠海御溫泉
雖然話就話喺珠海，但其實御溫泉係位於斗門，由九洲港碼頭坐酒店車要70分鐘車程。我哋08:40由港澳碼頭出發，中午12:00左右才抵埗
御溫泉有兩間酒店：舊啲嘅係御瀛庄，而我哋今次投宿嘅係十月新開張嘅雲來客棧
可能想加強客棧嘅特色，門口有兩頭驢仔同一隻牛。隻驢仔成日都被人困住喺圍欄入面，應該好悶囉...
雲來客棧嘅大堂，我地坐喺呢度等check-in
由大堂望出大門口
雲來客棧一共有四層，每間房門口都有枝旗仔寫住房間號碼
一入門口就會見到洗手盆，而大門嘅左邊就係廁所同企缸。設計簡單，而且真係好新淨
房間無咩多餘嘢，床就咁鋪係地台上面。地方都算闊落，好似話最多可以住6個人
放低行李，就出去行吓兼醫肚。呢度係另一橦酒店，御瀛庄嘅大堂，睇落真係比較舊
御溫泉有中餐亦有西餐，不過喺大陸都係食返中菜穩陣啲。左面就係食中菜嘅小食坊同御食坊嘅入口，右邊仲有間飛發錢莊(應該係收銀櫃)，估唔到同胞們都鍾意搞下gag！
小食坊係24小時開放，食嘅係我國四大發明:「粥粉麵飯」
先嚟一碗牛腩刀削麵：牛腩不過不失，而刀削麵師傅刀工好，麵條真係好薄，條邊仲呈花邊狀，食落好滑似河粉，不過旦酥糕爸就嫌唔夠咬口
刀削麵後面仲有一碟涼拌青瓜，真係大碟到嚇死人，可惜唔係太入味，同越食越辣
另一味係XO醬炒腸粉，鑊氣夠，味道足！套用返旦酥糕爸嘅評語:「炒腸粉都可以炒到似蘿蔔糕咁，正！」
啲腸粉真係好夠份量
煎餃，麻麻，韮菜太多味太嗆
穿過小食坊，就會到食中式小菜嘅御食坊
一坐低服務員就放低紙巾一包及前菜兩碟，盛惠RMB13
當然要先點呢度嘅名菜：泥煨雞。
味道不錯，但隻雞真係好細隻 (呢度已經係成隻雞!)。個汁嘅味道相當複雜，有啲似鹵水汁+藥材煮成，我覺得咸咗少少，旦酥糕爸就話啱啱好
味道不錯，但隻雞真係好細隻 (呢度已經係成隻雞!)。個汁嘅味道相當複雜，有啲似鹵水汁+藥材煮成，我覺得咸咗少少，旦酥糕爸就話啱啱好
我係蒜蓉怪，呢個籠仔蒸菜芯岩晒我！可惜菜芯唔夠靚有少少渣
另一味，竹架茄子，賣相十分吸引，以為係類似煎釀三寶，但原來似奶油薯餅多啲
呢味係香橙骨， 初初我地仲掙扎緊叫香橙骨定叫蒜香骨，但最後原來香橙骨都有蒜香味，真係... 雖然肥膏比較多，但味道不錯。其實只要係甜甜酸酸嘅嘢我地就鍾意
除咗係蒜蓉怪，我仲係薯仔怪，可惜呢味酸辣土豆絲麻麻，唔夠味
總括嚟講，御溫泉食用方面唔算好出色但合格，價錢同香港差唔多，但夠大碟 (尤其係啲小食同涼菜)。以佢哋位處偏僻，方遠幾哩都無咩人煙嚟計，汽水/椰汁只賣RMB5一罐，都算叫做有良心咯
食飽飽，抖一陣就去浸溫泉。呢度係露天溫泉區大堂。大堂右邊係親王府，即VIP房間，有私家溫泉，可惜想訂嘅時候已經full晒
溫泉接侍處，唔一定係御溫泉嘅住客先可以浸溫泉，呢度有淨溫泉門票賣，我見好多人坐車過嚟浸
溫泉區係24小時開放。我哋個package包埋溫泉門票，可以無限次任浸
溫泉區內當然無得影相，唯有用返官網嘅相片喇
溫泉區唔算好新，但算乾淨 (起碼唔話起晒泡或者有不明浮游物體)，區內有一個大池同幾十個細池。至於係咪天然溫泉我就有所保留 (我就聞唔到硫磺味)
我哋最鍾意係地熱帶: 石地板下有泉水管令到地板溫暖，瞓上去真係好舒服，我地初初真係打算瞓過夜，可惜蚊子大軍殺到嚟不得不撤退。我同旦酥糕爸講下次一定要帶埋蚊怕水去！
溫泉區仲有按摩服務，有平有貴。瞓緊响地熱帶時想嚟個平嘅腳底按摩，點知佢地嫌我地買半個鐘咁少，居然唔做我地生意！算，士可殺不可辱
之後我地去咗萬壽閣來個太醫五體 (其實我都唔係好明咩叫太醫五體)，總之按摩前會幫你先把脈，再因應你需要比杯藥酒同茶你飲，跟住就按摩。我地試咗十五絡推(RMB198，80min)，嘩，舒服到痺! 佢唔似平時中式按摩咁死摔你d筋，而係穴位按摩，由每隻手指腳趾一路㩒㩒㩒到心口，不會痕不會痛，讚！
再嚟幾張夜景：雲來客棧
近門口處的一棵大聖誕樹，而家連大陸都要搞聖誕消費
露天溫泉區大堂
總括黎講，御溫泉內除咗食/浸溫泉/按摩外都無咩特別嘢玩。不過近近地想relax吓都係一個唔錯嘅選擇
沒有留言:
張貼留言