家有三隻旦．酥．糕: 10日9夜絲綢之路 - 西安 • 烏魯木齊 • 天山天池 • 吐魯番 • 哈密 (上)

「天蒼蒼山隱隱茫茫途路...」。如果大家對這首歌有印象的話，相信你和我的年紀也差不多。

當年某電視台播出一輯有關絲綢之路的紀錄片，對內容已經沒有甚麼印象，但主題曲卻弦猶在耳。一直以來，絲路總給人一種神秘的感覺。長大後到了外國，外國人對中國歷史的認識，除了萬里長城之外，就要數絲綢之路了。當時還相約同學畢業後要到絲路跑一趟。

終於，某年的秋天，下定決心請5日大假，和老公出一起出發！

其實現在到絲路一點也不困難。隨便走進旅行社也有ABCD等等款式的絲路團任君選擇，食住行一概也安排妥當: 我們就點了一個10天的絲路套餐。

10天的絲路旅程不算辛苦，當然也不能算豪華。其實最要命的還是漫長的車程。多得我國經濟發展迅速，修橋補路等工程從未間斷，縱使路途遙遠，但走的全是高速公路，我腰骨可免去一劫！

基本行程 (旅行團)
Day 1: 香港 → 西安
Day 2: 西安 → 華清池 → 秦始皇兵馬俑博物館 → 烏魯木齊
Day 3: 烏魯木齊 → 天山天池 → 烏魯木齊 → 風力發電站 → 吐魯番 → 交河故城 → 蘇公塔
Day 4: 吐魯番 → 葡萄溝 → 阿不都拉維吾爾族家訪 → 火焰山 → 哈密
Day 5: 哈密 → 巴里坤大草原 → 星星峽 → 敦煌
Day 6: 敦煌 → 鳴沙山 → 莫高窟 → 酒泉
Day 7: 酒泉 → 嘉峪關 → 酒泉 → 酒泉公園 → 張掖 → 大佛寺 → 木塔寺
Day 8: 張掖 → 青海湖 → 西寧 → 日月山
Day 9: 西寧 → 塔爾寺 → 西寧機場 → 西安 → 大雁塔 → 唐文化藝術廣場
Day 10: 西安 → 古城牆 → 咸陽 → 漢陽陵 → 西安 → 香港

Day 1
香港 → 西安

Day 1: 出發到西安！

因為係晏晝機嘅關係，到達西安已經係傍晚，食過晚飯後就到鐘鼓樓一帶影下相。

Day 1: 西安 - 當麥當勞望著鐘鼓樓

Day 2
西安 → 華清池 → 秦始皇兵馬俑博物館 → 烏魯木齊

今日的行程主要係參觀西安市內的名勝。而參加旅行團又點少得參觀工藝品廠。喺酒店食過早餐後就到兵馬俑工廠參觀，工廠內有大大細細唔同尺碼嘅陶俑，其實都幾有趣 (不過唔好係果度買野，一個字: 貴！)。

Day 2: 西安 - 兵馬俑工廠：迷你秦俑嘅半成品

Day 2: 迷你秦俑

睇完A貨兵馬俑，跟住到楊貴妃同佢相公個私家SPA：華清池。皇家浴池其實無咩睇頭。

Day 2: 西安 - 華清池，楊玉環楊貴妃像

Day 2: 有個水上舞台，夜間會有表演

Day 2: 西安 - 華清池

探完楊貴妃，就參觀舉世知名，人稱世界第八大奇蹟: 秦始皇兵馬俑博物館。

Day 2: 西安 - 秦始皇兵馬俑博物館 - 一號坑

Day 2: 西安 - 秦始皇兵馬俑博物館 - 三號坑

Day 2: 跪射俑

Day 2: 西安 - 秦始皇兵馬俑博物館 - 二號坑，仲有大面積嘅兵馬俑尚未出土

唔講唔知，原來兵馬俑內嘅陶俑原本係彩色嘅，但經過年月嘅洗禮，陶俑上嘅顏料變得好脆弱，出土後無耐就會甩晒。其實而家兵馬俑坑內仲埋有大量秦俑尚未出土，希望科學家將來能夠研究出永久保存顏色嘅方法，等大家有機會睇到兵馬俑嘅原貌。

Day 2: 拜拜啦秦始皇

Day 2: 參觀完兵馬俑，食過午餐，就要出發到新疆烏魯木齊！

Day 3
烏魯木齊 → 天山天池 → 烏魯木齊 → 風力發電站 → 吐魯番 → 交河故城 → 蘇公塔

今次遊走絲綢之路係以外國人路線嚟行，即係以新疆省為起點，轉到甘肅省再到中原地帶峽西省西安。呢日大清早就出發到天山天池，原來西域景色和中原地帶真係大有不同。天山山頂終年積雪，所以天山一帶水資源十分豐富，處處綠草如茵，唔講真係以為自己去咗瑞士。

Day 3: 天山天池

Day 3: 天池中泛舟

Day 3: 真係好有瑞士feel

Day 3: 由天池坐索道(纜車)返去停車場，一路坐一路驚，因為睇到個車底生左鏽

離開烏魯木齊，我哋向火州 - 吐魯番進發！

前往吐魯番途中，我哋經過一個面積相當大嘅風力發電站，導遊小蘇講左一個笑話比我哋聽:「話說有一班一直住喺吐魯番一帶嘅公公婆婆，終於有機會四處遊覽，佢哋出發到烏魯木齊玩，旅程完畢，佢哋坐返車返吐魯番時經過風力發電站，其中一個婆婆「哦」咗一聲，好似若有所悟，說: 「唔怪得之烏魯木齊果邊咁涼快，我哋吐魯番又咁熱啦！原來呢度有咁多把風扇吹住烏魯木齊，吹晒我哋啲涼風過去咯...」(請大笑)

Day 3: 烏魯木齊往吐魯番途中 - 風力發電站

下一個目的地，世界上最大，最古老同保存得最完整嘅生土建築城市：交河故城。故城，即係以前繁榮但而家荒廢嘅城市；交河，係因為佢處於兩條河嘅交會點上，而四周則是崖壁。可想而知，交河故城擁有極佳嘅地理環境，係兵家必爭之地。可惜交河故城最終毀於13世紀末的一場戰爭中。

Day 3: 吐魯番 - 交河故城

Day 3: 依稀仲睇到城中規劃

Day 3: 吐魯番 - 交河故城

去完交河故城，已經感受到火州嘅威力，不過人類適應能力好強，縱使位處盤地，天氣炎熱，水源缺乏，但吐魯番一帶嘅人民，為左解決水源問題，創造出一項偉大工程：坎兒井。坎兒井擁有2000多年歷史，係戈壁沙漠的地下大運河，河道將千里之外嘅天山雪水引到吐魯番一帶，諗起都覺得犀利！

Day 3: 吐魯番坎兒井博物館

Day 3: 坎兒井為戈壁和沙漠地區提供水源

Day 3: 吐魯番 - 坎兒井

去完坎兒井，下一站就係蘇公塔。蘇公塔又名額敏塔，係以伊斯蘭教藝術風格建築。於清朝乾隆期間由吐魯番郡王額敏和卓為「報答天恩」而建。塔高44米，全由磚頭砌成，但過咗咁耐，又地震過幾次，蘇公塔嘅結構已經有啲危危乎，所以而家要上塔頂要比RMB300！收天價其實都係想限制上塔人數，不過比我上都唔上咯，萬一我唔小心整散座塔點算？

Day 3: 吐魯番 - 蘇公塔

Day 4
吐魯番 → 葡萄溝 → 阿不都拉維吾爾族家訪 → 火焰山 → 哈密

因為有坎兒井，令吐魯番有足夠水源，咁就種到佢地最出名嘅葡萄喇！無錯，今日就係參觀葡萄溝，睇下吐魯番嘅人點種葡萄。

Day 4: 吐魯番 - 葡萄溝

當地人葡萄枝會搭喺啲棚架上面，但到咗冬天，佢哋就會將葡萄枝收起埋喺地下，以防嚴冬來臨將葡萄樹凍死。

Day 4: 果實纍纍，伸手可及

離開葡萄溝之後，我哋去其中一條村嘅村長：阿不都拉先生嘅屋企做家訪。唔好睇村長粗枝大葉咁，其實佢喺烏魯木齊讀完大學㗎！佢除咗介紹咗唔同品種嘅葡萄比我哋認識，仲請我哋食佢啲村民種嘅瓜瓜果果，當然都要sell下啲土產，不過佢地啲葡萄乾又真係幾好食！

Day 4: 吐魯番 - 阿不都拉的家，村長請客，大家隨便食

Day 4: 平時最憎食乾果嘅旦酥糕媽呢日居然食葡萄乾食到停唔到口，村長嘅葡萄乾真係好似軟糖咁好味。我哋仲有機會食到玫瑰味嘅葡萄乾，係100%天然無香料，村長喺葡萄樹四圍種滿玫瑰花，花粉交叉傳播令葡萄都帶有玫瑰味！

聽完葡萄，食飽葡萄，買夠葡萄，就去火焰山搵孫悟空啦！

火焰山唔係淨係得個名，夏天最熱嘅時間，四週氣溫可高達攝氏50度！而山體溫度最高有攝氏82度！要煎熟幾隻蛋絕對無問題。而點解火焰山係暗紅色？係因為山體表面嘅砂石含有大量嘅鐵，當鐵質外露而生繡就會變成紅色。

Day 4: 吐魯番 - 火焰山

Day 4: 好大枝溫度計

Day 4: 老孫你好！

Day 4: 去完火焰山，就離開吐魯番出發到新疆最後一站：哈密。而哈密最出名係咩？傻嘅都知係哈密瓜啦！去到休息站就見到一地都係哈密瓜，導遊小蘇仲請我哋食，好．好．味．呀！！！

Day 5
哈密 → 巴里坤大草原 → 星星峽 → 敦煌

今日我哋就要離開新疆出發到甘肅省。因為要趕路，所以為咗爭取時間，我哋喺車上享用咗一餐好特別嘅早餐：肉腸，青瓜，雞蛋，麵包，榨菜，牛奶... 但全部係包裝食物。

Day 5: 特式早餐

經過一段山路，終於到咗新疆段最後一個景點: 巴里坤大草原。原本嘅節目係去哈薩克牧民屋企家訪，但因為當時天氣已經好凍 (雖然只係九月，但巴里坤大草原屬於高原地帶，晚上嘅溫度已經差不多得零度)，牧民已經連牛帶羊搬晒落山過冬，但塞翁失馬，焉知非福？無人探就改去騎馬仔啦，哈哈，咁大個女都未騎過馬，而啲馬仔咁細隻，跌落地都唔使驚啦！全團人就騎住馬仔欣賞巴里坤大草原一望無際嘅美景！