家有三隻旦．酥．糕: 6日5夜日本輕井澤+東京自由行 (上)

Prince Shopping Plaza Outlet

(按: 由於最近多咗人詢問有關輕井澤嘅資料，所以我特別加多咗照片同info，希望幫到大家)

2009年復活節去咗日本自由行，一共6日5夜，4晚輕井澤，1晚東京

當時輕井澤正值初春時份，樹枝仲係光禿禿，所以景色唔算十分靚 (秋天應該係最靚嘅季節)，不過環境真係好舒服，非常悠閒。

行程規劃:
Day 1: 香港 → 東京羽田機場 → JR 長野新幹線 → 輕井澤 → Prince Shopping Plaza Outlet
Day 2: 鬼押出園 → 舊輕井澤銀座 → 舊輕井澤森ノ美術館
Day 3: (單車之旅) 中輕井澤(旅館附近) → 高原教會 → 石之教會 → 新輕井澤 → 舊輕井澤 →
日本聖公會輕井澤A.C.Shaw紀念禮拜堂 → 聖保祿天主教教堂 → 舊三笠旅館 → 雲場池 → 回程
Day 4: 淺間牧場 → 白糸之瀧 → 舊輕井澤銀座買手信
Day 5: 輕井澤 → JR 長野新幹線 → 大宮 → 赤羽 (Super Hotel) → 台場 → 新宿
Day 6: 吉祥寺 → 井之頭恩賜公園 → 池袋 → 羽田機場 → 香港

Day 1
香港 → 東京羽田機場 → JR 長野新幹線 → 輕井澤 → Prince Shopping Plaza Outlet

今次我哋坐凌晨機. 早上6點鐘已經抵達羽田機場. 我哋先由機場坐東京單軌列車到濱松町站，之後轉JR到東京站坐長野新幹線。
(注意往輕井澤每日有唔同班次，有啲係快車會飛站，有啲會站站停，出發之前可以先計劃一下)

不過係一個多小時嘅車程，就到達輕井澤，打個電話給旅館老闆Ito-San，友善嘅Ito-San先接我哋到位於中輕井澤旅館Cottage Inn Log Cabin休息一陣 (凌晨機真係完全瞓唔到)，之後再出發到Prince Shopping Plaza Outlet

Day 1: 東京單軌列車

Day 1: 係濱松町站落車再轉JR到東京撘新幹線

Day 1: Prince Shopping Plaza Outlet，環境又大又靚

Day 1: 不過價錢唔係想像中咁平，所以無咩收獲

Day 1: 响Outlet內嘅餐廳食晏，食物賣相同味道都不錯！

Day 2
鬼押出園 → 舊輕井澤銀座 → 舊輕井澤森ノ美術館

早上坐45分鐘巴士到鬼押出園. 下午出返舊輕井澤銀座食晏同行街，參觀左舊輕井澤森ノ美術館，主要係介紹錯覺藝術，相當有趣！
(按: 往鬼押出園嘅巴士班次比較疏落，建議先到輕井澤火車站內的旅遊服務中心問職員攞咗巴士時間表，而巴士站就喺輕井澤火車站隔離，唔難搵)

Day 2: 從鬼押出園望到嘅淺間火山，當時火山係度標煙！

Day 2: 1783年淺間山大爆發，流出嚟嘅熔岩凝結成而家嘅鬼押出園

Day 2: 鬼押出園 (鬼押出し園)

Day 2: 成個山頭都係呢啲黑色嘅火山岩石

Day 2: 土地公都怕凍？

Day 2: 鬼押出園

Day 2: 淺間魔除鬼，隻隻造型都好搞鬼，可以話呢度嘅ICON，連Hello Kitty都有份扮佢！

Day 2: 去完鬼押出園，我哋返到輕井澤食晏，
呢間高美亭最出名食蕎麥麵 (係輕井澤火車站附近)，好味！

Day 2: 食完晏我哋沿住大直路步行到舊輕井澤銀座 (步行大約30分鐘)

Day 2: 觀光案內所

Day 2: 很有趣嘅懷舊影樓

Day 2: 謀殺最多時間嘅龍貓共和國

Day 3
單車路線: 中輕井澤 → 高原教會 → 石之教會 → 中輕井澤 → 新輕井澤 → 舊輕井澤 → 日本聖公會輕井澤A.C.Shaw紀念禮拜堂 → 聖保祿天主教教堂 → 舊三笠旅館 → 雲場池 → 中輕井澤

今次旅程嘅重點項目: 單車之旅. 輕井澤地方不算大，十分適合以單車去遊覽. 而且輕井澤嘅單車路線規劃得好好，沿路都以數字作為標記，緊記自己目的地嘅編號，應該唔係咁容易蕩失路。

我哋前一晚同旅館老闆表示想踩單車，一早佢就楂車載我哋到附近嘅單車鋪，單車店嘅店主係一位滿面笑容嘅老婆婆，旅館老闆代我們溝通好，再指手劃腳一番，我哋終於揀好單車，店主婆婆亦好細心咁俾咗一份單車地圖我哋。一切準備就緒，拎住地圖就出發咯！

(按: 輕井澤火車站對出，往舊輕井澤方向的大街沿路都有幾間單車鋪，可以分時段，如半日/全日等租用，而價錢大約1000-2000yen之間)

由中輕井澤出發，先到不遠處嘅高原教會同石之教會。
(兩者同位於一個小山丘之上，我哋將單車泊喺山腳，就慢慢徒步往上行)

Day 3: 輕井澤高原教會

Day 3: 參觀當日係星期六，眼見婚禮不絕，不過當中有幾多個真係基督徒

教堂內不得拍照，有興趣可以到網站參觀:
http://www.blestoncourt.com/chinese/index.html

Day 3: 石之教會內村鑑三紀念堂，門口嘅木架似唔似一隻大蜘蛛？

Day 3: 石之教會嘅建築風格非常前衛

教堂內又係嚴禁拍照，有興趣可以到網站參觀:
http://www.blestoncourt.com/chinese/building/index.html

Day 3: 這應該是內村鑑三的墓碑，上面刻著:
"I for Japan; Japan for the World; The World for Christ; And All for God."

Day 3: 「燒雞翼！~~~我鍾~意食！」
參觀完兩間教堂都差唔多時候食晏啦，出返舊輕井澤，今次食燒雞！

(要一讚日本人待客之道，呢度只得寫係牆上的日文menu，店內又無人識英文，
其中一個侍應特登去唔知喺邊度搵張print-out比我哋，我哋看圖識字手指指咁點左幾樣!)

Day 3: 食完晏去執返自己部單車，之後到輕井澤第一間教堂 -
日本聖公會輕井澤ショー紀念禮拜堂

(按: 輕井澤市內到處都有單車停泊處，而每部單車都built-in咗一個單車鎖，所以要泊車都非常方便)

Day 3: 不遠處係另一間教堂，聖保祿天主教教堂

Day 3: 參觀完位於舊輕井澤嘅景點，就踩呀踩呀，再踩呀踩呀，
終於到達舊三笠旅館。
(呢段路比較長和有暗斜，有啲辛苦，不過沿路兩旁都有好多大樹，十分恬靜舒適)

Day 3: 曾經接待皇室同外賓嘅旅館，可以話係輕井澤地標之一
圖為旅館內的大廳

Day 3: 舊三笠旅館

Day 3: 參觀完舊三笠旅館，再踩呀踩呀...

Day 3: 沿住指示就踩到雲場池啦！無改錯名，
真係一個池嚟啫，圍住用腳行一圈都唔使十五分鐘，
不過環境好舒服，係當地人散心玩樂嘅好去處！

Day 3: 係雲場池見到太陽已經開始落山，又係時候回程啦！

是次單車壯舉總共用咗8個小時 (9:00am出發，5:00pm還單車)，
雖然當中有遊玩同食晏時間，不過屁股同兩隻腳依然赤赤痛。
(好在我醒目買定盒「休足時間」，果然大派用場！)

Day 3: 旅館附近嘅民居，好似日本卡通嘅片果啲

住宿

Cottage inn Log-Cabin
http://www.log-cabin.co.jp/en

位於中輕井澤，交通有少少唔方便，不過旅館主人Ito-San非常友善好客！用英文溝通絕無問題！只要預早一日通知Ito-San你嘅行程，佢都會盡量安排免費接送！
(註：輕井澤附近有好多溫泉，想浸溫泉可以叫Ito-San幫忙安排)