家有三隻旦．酥．糕: 2日1夜飲飽食醉澳門遊 - 威斯汀 • 福隆新街 • 福龍 • 法蘭度

每年結婚週年記念，我和老公都會以一個短途旅行作為慶祝。多得阿蘇早前的節目，三週年記念的旅行，澳門以大熱姿態勝出！

Day 1: 香港 → 澳門 → 威斯汀度假酒店 → 福隆新街 → 聯記麵食 → 美的雪糕→ 大三巴 → 福龍葡國餐
Day 2: 法蘭度餐廳 → 官也街 → 大利來豬扒包

Day 1

Day 1: 這是我們的酒店：位於路環的威斯汀度假酒店

Day 1: 客房

Day 1: 露台望出去黑沙海灘

Day 1: 露台望出去酒店泳池

正式開始搵食之旅。第一站：福隆新街 (都幾難搵,因為好多地圖都無寫到呢條街名)

本來打算食厚切芝士包同蟹盒，點知去到兩間鋪都落咗場... (所以奉勸各位，閒日去的話一定要揀食飯時間去！) 唔緊要，立即改變策略，改食聯記麵食(清平直街)之蝦籽撈麵！

終於開始第一餐。我叫咗招牌蝦籽撈麵：麵靚而無鹼水味，蝦籽香口又夠多，可惜麵質唔算好爽口，比較細碟同埋都幾油。
老公另外叫咗水餃蝦籽撈麵，但水餃有啲失手，餃皮有點爛，不過味道算唔錯。再叫多碟油菜，冬天的菜芯特別好食！

聯記麵食雖然鋪仔細細，但服務態度相當不俗，臨走時老公係咁影住煮麵師傅都無俾人趕 :)

Day 1: 福隆新街

Day 1: 聯記麵食 - 蝦籽撈麵

食完麵正想行返出大街，就見到架雪糕車，就係啲雪糕賣得超級貴個部。一粒湯丸咗右大嘅雪糕波居然要收十蚊！味道分別有士多啤梨，蜜瓜同芋頭,老闆得戚咁話自己可以做到一球三味。我最終揀咗雙色，但下次都係揀單味好，因為咁細個波太多隻味都分唔出邊隻打邊隻。

其實啲雪糕真係好香同滑，但實在太貴啦！順帶一提，個老闆都幾多嘴...

Day 1: 懷舊雪糕車 - 美的雪糕

Day 1: 新馬路

行完到新馬路行吓幫助消化

Day 1: 民政總署大樓

Day 1: 台灣帝鈞碳烤胡椒餅

因為計劃夜啲去食厚切芝士包，
所以間場時段就去咗大三巴附近食胡椒餅

Day 1: 用料都算足,不過老公話味道一般，
始終都係台北龍山寺附近果間最好味！

Day 1: 新馬路的夜景

磨下磨下到6點，福龍終於開門啦！二話不說即叫個厚切芝士包先：好味呀！外脆內軟，芝士味又唔會太濃 (本人好怕臭芝士)。另外叫咗個咖喱牛尾：咖喱好香口而唔會太辣，質地比較稀身，用嚟點麵包一流！最後當然唔少得佢地嘅招牌鴨飯：一層飯，一層切碎咗嘅鴨肉同腸，再多一層飯...食落有少少似煲仔臘味飯，而啲鴨油沁晒入啲飯度...嘩！正！

Day 1: 福龍葡國餐

Day 1: 厚切芝士包

Day 1: 咖喱牛尾

Day 1: 招牌鴨飯

Day 2
第二日早上，先係酒店食個簡單早餐，11點咗右就出發到今次重點：法蘭度餐廳。由酒店出發，沿著黑沙海灘行去要小半個鐘，一去度已經排晒長龍，好彩最後都順利入坐！

如果大家都想食法蘭度的話，我建議大家選擇中午去，一來夜晚唔知要等到幾點，二來個度位處偏僻，日頭去無咁容易蕩失路。

入正題，開餐啦：麵包人人有份。先黎一個沙律：蕃茄非常新鮮，個dressing酸酸地好開胃。我自己就點咗半瓶Sangria，唔好睇少佢係水果酒，飲咗一半我已經浮浮地 (係...我認我酒量差...)。跟住出場嘅係燒沙甸魚，都燒得好香，可惜塊皮就咸咗少少。或者因為我個人對魚的興趣不大 (「咁你又叫！！！」)，最後都要將碟魚三二分帳：老公食三條我食一條半 (仲有半條趁無人為意比我埋咗係堆渣滓下面)。

我地當然有叫到招牌菜燒乳豬食，但因為等得太耐嘅關係，一嚟到就本能反應地放晒入口，醒起要影相嘅時候已經得返啲豬骨...不過唔緊要，佢嘅味道已經深深咁印咗係我腦海，真係好好食，正所謂皮脆肉嫩就係呢款 (雖然仲有幾條豬毛未清晒)。

Day 2: 沿著黑沙海灘向法蘭度

Day 2: 法蘭度餐廳

Day 2: 沙律，麵包，Sangria

Day 2: 燒沙甸魚

Day 2: 黑沙海灘嘅小食檔

食完法蘭度就出去官也街(由黑沙海灘撘的士去官也街都要成五六十蚊！過份！)。去到氹仔居然比我見到一整竇貓，對我呢個貓痴黎講可謂一大驚喜。其中一隻擁有藍眼睛嘅白(正確啲應該係灰)貓，口渴就走去人地個桶度飲水。飲咁耐就企咁耐，非常搞笑！

嚟到氹仔當然唔少得最出名的大利來豬扒包！當日去到嘅時候係兩點九，已經好多人排隊等三點正出爐的豬扒包。唔講唔知，食豬扒包要排隊，但豬扒多士係唔使排嘅！只要搵個位坐好叫人幫你落單就得，所以黎咗三次都未食過豬扒包，因為條隊實在太恐怖。

食完豬扒包，是次澳門美食之旅亦告終！