家有三隻旦．酥．糕: 6日5夜日本輕井澤+東京自由行 (下)

白糸の滝

Day 4
淺間牧場 → 白糸之瀧 → 舊輕井澤銀座買手信

早上坐30分鐘巴士到淺間牧場，一落車就已經非常失望: 全個牧場得四隻羊同一隻馬，正如老公話齋「荔園未拆前都靚過佢！」留咗一陣就坐巴士到白絲瀑布: 白糸之瀧，瀑布唔算宏偉，但別有一番風味。去完瀑布就返到舊輕井澤買手信，大條道理去shopping！

(按: 往淺間牧場和白糸之瀧的巴士班次比較疏落，建議先到火車站內的旅遊服務中心向職員索取巴士班次時間表)

Day 4: 餓小羊

Day 4: 另一隻餓小羊

Day 4: 食咗搖頭丸嘅馬，望佢咁耐就fing足咁耐...

Day 4: 可能真係唔啱時候，夏天嚟草地綠油油一遍，應該會靚好多

Day 4: 參觀完淺間牧場，就坐巴士出發到白糸之瀧
圖為有型嘅巴士司機叔叔

輕井澤嘅巴士係分段收費，若果係中途站上車，記得要上車時拎一張整理券 (就喺就係巴士門附近)，上面印有本站嘅號碼，而巴士正前方有一個電子收費表，咁就可以知道由A站去B站要俾幾多錢喇，落車時要將整理券同車費交俾司機。

Day 4: 坐幾個站就到白糸之瀧 (白糸の滝)

Day 4: 落車就見到一檔燒魚，留意咗上方嘅告示，翻譯得很有趣！

Day 4: 往瀑布嘅途中

Day 4: 行無幾耐就到！

Day 4: 白絲瀑布 (白糸の滝)

顧名思義，瀑布嘅流水真係好似絲線咁幼，唔算宏偉，不過別有一番風味

Day 4: 白糸之瀧

Day 4: 有好多龍友，啲公公婆婆對住一個景可以影半日

Day 4: 去完白絲瀑布，就返到舊輕井澤銀座買手信

Day 4: 買手信嘅時候口痕痕咁買咗呢個野菜包，
咪睇佢其貌不揚，原來都好好味！

Day 4: 果醬係輕井澤嘅特產，大部份鋪頭都有得試食，梗係要試過夠！
(鳴謝旦酥糕爸提供相片)

Day 4: 是夜是最後的晚餐，一於豪俾佢嚟個和牛宴！
(鳴謝旦酥糕爸提供相片)

其實我哋間旅館嘅費用已經包括早/晚餐，平時都有烤肉食 (貨色當然是一般啦)，今晚我哋額外加多一盤和牛海鮮拼盤 (呢度不過係4200yen，抵！)，真係好好味呀！！！

(按: 其實我哋旅館嘅飯堂就正正係老闆另外經營嘅烤肉店 - ろぐ亭 http://www.logtei.jp，除咗中輕井澤，係outlet都有一間分店AJ-07鋪，大家有興趣可以去試試！)

Day 5
輕井澤 → JR 長野新幹線 → 大宮 → 赤羽 (Super Hotel) → 台場 → 新宿

今日要離開輕井澤到東京了，先在此多謝ITO-SAN嘅親切招待。

Day 5: 由火車站坐新幹線到大宮站，再轉JR到赤羽站

Day 5: 今次住位於赤羽嘅Super Hotel AKABANE

我哋搵咗一輪先搵到間酒店，但，點解無人? 吓? 10-3點係清潔時間無得入? 咁我哋拎住啲行李點算? 我哋係出面擾攘咗一陣，終於有個姐姐開門比我哋，好在可以放底啲行李係大堂。

Day 5: 放好行李就出發到台場Cats LiviN 玩貓貓

Cats LiviN佈置到好似屋企咁，貓貓們可以隨意走動

Day 5: 但隻隻都係老油條，認小食唔認人

Day 5: 好靚貓！

Day 5: 呢隻康沃耳帝王貓 (Cornish Rex) 應該好唔舒服，
成程無咩郁又眼濕濕咁，幫佢R背脊仲想咬我，Sorry囉！

Day 5: 夕陽下的彩虹橋

Day 5: 富士電視台

Day 5: 返到新宿食拉麵 (博多天神)

Day 5: 味道同賣相都一般

Day 6
吉祥寺 → 井之頭恩賜公園 → 池袋 → 羽田機場 → 香港

最後一日，早上到吉祥寺食Satou吉列牛肉球，原來十點先開始賣，但未開賣已經有人排隊，可見的確極受歡迎。本人覺得有很香嘅洋蔥味，肉汁都好豐富，可惜就無咩牛肉味，但都值得一試。

食完牛肉球就到井之頭恩賜公園睇櫻花。但...啲櫻花呢? 無晒嘅? 原來已經吹晒落地啦...雖然有啲失望，但公園內的環境都好靚，同老公拍下拖都好浪漫丫！

去完公園，就到池袋Tokyo Hands嘅Nekobukuro玩貓。呢邊d貓大帝算好俾面肯同我玩咗一陣。時間越黎越緊逼...玩完貓拿拿臨到藥房掃貨，再到一蘭食拉麵。食完急急腳咁走去撘JR，途中居然比我哋見到棵仲盛開緊的櫻花！影咗幾張就返酒店拎行李出機場了。