家有三隻旦．酥．糕: 10日9夜絲綢之路 - 敦煌 • 莫高窟 • 嘉峪關 • 青海湖 • 漢陽陵 (下)

上回講到旅遊巴駛過星星峽，就要同新疆維吾爾自治區告別，正式進入甘肅省。

Day 6
敦煌 → 鳴沙山 → 莫高窟 → 酒泉

甘肅第一站：敦煌。大家如果對絲綢之路有一定認識嘅話，就必定聽過敦煌呢個大名。敦煌可謂絲路中嘅重要城市。文化遺產相當豐富。呢一日，我哋大清早就出發到著名景點：鳴沙山。

我哋係入口等工作人員安排，就騎上五隻一隊嘅駱駝前進。我係第一次騎駱駝，佢地都算溫馴，仲好有好奇心。我哋騎住駱駝，無幾耐就到沙漠奇蹟：月牙泉。月牙泉雖然處於沙漠中，但水源永遠充足。我哋去個日啲泉水簡直滿到瀉，搞到月牙唔似月牙。除左睇景，團費仲包玩一次滑沙。不過要行上條上百級嘅筆直樓梯都幾要命，難為啲伯伯每日要走幾轉搬啲車呔上黎比我哋用。

Day 6: 敦煌 - 嗚沙山

Day 6: 曬駱駝

Day 6: 騎著駱駝前進

Day 6: 唔似月牙嘅月牙泉

Day 6: 仲可以玩滑沙

睇夠玩完就騎返駱駝出去，離開鳴沙山。下一站，莫高窟！

Day 6: 敦煌 - 莫高窟

莫高窟係中國文化嘅一大寶藏，已經有1600多年嘅歷史。莫高窟共有千多洞龕，洞內有無數嘅壁畫同塑像。我哋只係參觀咗幾個比較有代表性嘅洞龕，而為左保國家一級文物，所有洞龕都係嚴禁拍照。

Day 6: 指示牌

Day 6: 九層樓，內有一尊高34.5米嘅佛像

Day 6: 莫高窟做咗維修同保護工程。下面齊整嘅係人工建造，上面不規則嘅先係原貌

Day 6: 為防止文物受到風雨陽光影響，莫高窟嘅泂穴都裝咗一度度門。

Day 6: 睇完莫高Gallery，經過戈壁灘，就要去我哋呢晚嘅落腳地：酒泉

Day 7
酒泉 → 嘉峪關 → 酒泉 → 酒泉公園 → 張掖 → 大佛寺 → 木塔寺

今朝一早走返少少回頭路，先到「天下第一雄關」：嘉峪關。嘉峪關位於萬里長城嘅最西端，而城樓於明朝建成，已經有600多年歷史。

Day 7: 天下第一雄關：嘉峪關

Day 7: 嘉峪關

Day 7: 由城牆上望出去，見到四野荒蕪嘅戈壁灘

睇完長城，又返到酒泉參觀酒泉公園。到底酒泉點解叫酒泉? 話說當漢代大將霍去病擊退匈奴有功，武帝賞賜御酒，霍將軍實行有福同享，將御酒倒入泉中，與眾將士有酒齊齊飲。

Day 7: 酒泉公園

Day 7: 地下有精緻嘅銅製浮雕裝飾

Day 7: 相傳霍將軍就係將御酒傾倒係呢個泉度

Day 7: 酒泉公園

既然酒泉有酒，又點少得夜光杯？我哋之後去到夜光杯廠，起初以為又係另一個無聊購物點，點知睇落又好有趣。眾團友都聽得津津有味，大家亦都乖乖咁打開銀包大捐血；而我覺得最大得著就係知道夜光杯原來係唔識自己發光，而係因為以墨玉所造嘅杯身非當透薄，薄到連月亮光線都能射透，有如黑夜中發光，所以得名為夜光杯。

Day 7: 夜光杯廠內，每隻夜光杯都係由人手打造，隻隻都獨一無二

Day 7: 薄到透光

離開酒泉，就出發到張掖參觀大佛寺同遠望木塔寺

Day 7: 大佛寺

Day 7: 木塔寺

Day 8
張掖 → 青海湖 → 西寧 → 日月山

離開張掖，我哋就出發到行程嘅另一個高潮：青藏高原。青，係青海個青；藏，係西藏個藏。嚴格嚟講，青藏高原唔算係絲路嘅一部份，但沿途風景實在美不勝收！叫得做高原，海拔要有返咁上下。我哋坐住旅遊車，一路上一路上，跨過祈年山脈，最高海拔達4300米。為免我哋過份緊張，導遊一路解釋高原反應好多時都係心理作用，不過上到咁高嘅地方，少少頭脹脹，耳塞塞實在係少不免。

係青海省見到嘅風景，同新疆或甘肅省嘅又好唔同。一路望落去都係藍天白雲同無邊際嘅草原，間中會見到大群牛羊聯群結黨咁過馬路。而下一站我哋就會到中國最大嘅鹹水湖：青海湖。

Day 8: 向青藏高原進發，遠遠望到連綿嘅雪山尖。

Day 8: 沿途不時見到藏族牧民家

Day 8: 旅遊巴沿著山路慢慢向上，不知不覺已接近海拔4000米，自己有少少高山反應：有輕微耳鳴同頭脹

Day 8: 一路上都好多好多羊，真係見羊多過見人，而羊屁股嘅顏色係佢哋嘅ID，代表佢地屬於邊家牧民

Day 8: 青海湖 - 金沙灣風景區

我哋喺青海湖嘅金沙灣風景區落車，坐住吉普車到達湖邊，湖水不算清澈，不過景色好靚，對住一望無際嘅大湖，忽然覺得自己好渺小，亦驚嘆造物主嘅奇妙：神確實有無窮嘅想像力和創造力！

Day 8: 青海湖

Day 8: 團友可以楂四驅車，不過要先test下你識唔識楂，我哋最後無玩度，怕肥佬會好瘀

去完青海湖，旅遊車就會經過青藏高原及黃土高原嘅分界線：日月山。日月山係古時吐蕃同中原嘅交界，相傳文成公主都係經過呢坐山嫁去吐蕃 (即而家嘅西藏)。翻過日月山，離開青藏高原，眼前景色又大有不同：由一望無際嘅草原，變成井井有條嘅耕地，亦都表示我哋正式踏入黃土高原。

Day 8: 開始見返啲草以外嘅植物

Day 9
西寧 → 塔爾寺 → 西寧機場 → 西安 → 大雁塔 → 唐文化藝術廣場

今日係喺青海省嘅最後一日。朝早我哋出發到藏傳佛教六大寺院之一：塔爾寺。參觀完覺得藏人對宗教嘅熱誠真係好強烈 (亦第一次領教到酥油燈嘅厲害！完全明白咩叫唔食羊肉一身羶)。

Day 9: 塔爾寺

Day 9: 喺塔爾寺外見到呢個donut X 牛脷酥嘅小食，忍唔住買咗一個嚟試

Day 9: 午飯後有藏式月餅食 (但唔好食，好似隔夜饅頭，又乾又無味)

遊完塔爾寺，我哋坐內陸機返到西安，參觀大慈恩寺和寺內嘅大雁塔，相傳唐三藏係度主持寺務同翻譯經文，所以寺外嘅唐文化藝術廣場有一座唐三藏嘅銅像。

Day 9: 大雁塔，呢位就係唐三藏啦

Day 9: 大雁塔

Day 9: 大慈恩寺

Day 8: 喺大雁塔旁邊嘅唐文化藝術廣場

Day 10
西安 → 古城牆 → 咸陽 → 漢陽陵 → 西安 → 香港

今日係旅程嘅最後一日。(題外話，就係前一晚雷曼兄弟宣佈清盤，所以呢日有幾位團友顯得憂心忡忡，無晒笑容)

早上興緻勃勃到西安古城牆，去完就一肚火，點估到古蹟會變成購物點，入到城樓比人勁sell貔貅？激氣，國家級文物點解會比人做咗促銷場？火上加油嘅係之後又要去多個購物點絲綢店，困左喺個度差唔多兩個鐘先有得食晏。

Day 10: 古城牆，西安嘅空氣污染相當嚴重

Day 10: 古城牆

俾人硬銷完兩個鐘，正盤算返到香港點樣寫封投訴信時，居然仲有一景點令我哋大開眼界：就位於咸陽市嘅漢陽陵。漢陽陵係漢朝第四個皇帝漢景帝嘅陵墓，同秦始皇嘅兵馬俑一樣，陸墓入面有好多陶俑做陪葬，不過就細隻好多。陶公仔包羅萬有，有男有女有太監，豬牛雞馬羊狗食物用具等樣樣都有，但點解啲公仔無晒手，又無著衫嘅？原來當年啲陶公仔有可活動嘅手手，又有衫著，不過經過二千幾年，木造嘅手同絲質衫都化成灰囉...

去完漢陽陵真係令我大開眼界。難得博物館內嘅裝修一啲都唔娘！簡直係潮添！如果大家有機會去西安嘅話，不妨行一轉。